Euskal Konpositoreen Bilduman Bernaolari eskainitako diska aurkeztu berri da

Komunikabideen aurrean aurkeztu berri da Euskal Musikagileen Bildumako XV. zkia. Carmelo Bernaolari eskainia, bildumako azkena da. Orkestraren Miramongo egoitzan izan den prentsaurrekoan aritu dira Cristina Uriarte, Hezkuntza, Hizkuntza Politika eta Kulturako sailburua eta Orkestrako presidentea, Iñigo Alberdi, Orkestrako zuzendari nagusia; Juanjo Mena, grabaketako zuzendaria; José Luis García del Busto, musikologoa eta Carmelo Bernaolaren biografoa, eta Javier Marcos, bilduma honetako babesle MONDRAGON Corporation-eko komunikazio zuzendaria.

Carmelo Alonso Bernaola (Otxandio, 1929-Madril, 2002) XX. mendeko musikan zen ezinbestekoak diren izenen artean dago, zalantzarik gabe. Euskadiko Orkestra Sinfonikoak sortzaile nabarmen honen lanarekin amaitu nahi izan du bere Euskal Konpositoreen Bilduma, azken mende eta erdiko euskal musikaren berrikusketa 15 bolumenetan.

Carmelo Bernaolaren ekarpena ez da soilik berezkoa zuen lengoaiaz gauzatutako ekoizpenean islatzen, baita ondorengo belaunaldiko musikari gailenen maisu eta oinarri izatean ere. Egungo panoraman nabarmentzen diren musikari hauen artean dugu grabaketa honen musika zuzendari Juanjo Mena bera.

Baina, bere obraren balio historikoaz gain, era berean aipagarria da Carmelo Bernaolaren eta Euskadiko Orkestra Sinfonikoaren arteko lotura: konpositore gisa, berari zuzendu zitzaion, 1985. urtean, Euskadiko Orkestrak eginiko lehenbiziko konposizio-enkargua. Honela zabaldu zen gerora Orkestraren ezaugarri bihurtu den enkargu-politika emankorra, egun Tesela proiektua dugu horren erakusle. Gainera Orkestrak Miramongo Matinéeak, Musika Hamabostaldia, Musikaste eta abarretara eraman du Bernaolaren lana. Zuzendari lanetan, hainbat emanalditan aritu zen EOSen podiumetik, esaterako Donostiako Nazioarteko Zinemaldian (1983) eta "Armonías Vascas" diskaren grabaketan (1985).

Jesús Guridirekin hasi eta Carmelo Bernaolarekin amaitu: Bilduma osorik. Jesús Guridi eta Carmelo Bernaola elkarri eskua emanez, beraiek dira Euskal Konpositoreen Bildumako hasiera eta bukaera. Bata eta bestearen artean, 1997. urtetik gaurdaino, XIX. mende amaieratik XXI. mende hasierara euskal sinfonismoaren historia idatzi duten konpositoreen ekoizpenaren lagin adierazgarria jaso du Bildumak, gure kultur ondareari jada herri honen musika tradizio aberatsaren zati diren obrak gehituz.

Konpositoreei egindako enkarguen bidez sorkuntza bultzatu eta euskal musika ondarea zuzenean zabaltzeaz gain, grabaketen bidez honen iraunkortasuna bermatzea da Euskadiko Orkestra Sinfonikoaren jardueraren ardatz nagusienetako bat.

Informations additionnelles