Lionel Bringuier Iruñeko Baluarte Auditoriumeko podiumera igoko da asteazken honetan, martxoak 4, 20:00etan, Euskadiko Orkestra Sinfonikoa zuzentzeko, 'Paris' izeneko kontzertu batean. Kontzertu hori musika-taldearen 19/20 Abonu Denboraldiaren bosgarren hitzordua izango da Nafarroako hiriburuan. Paris musika-munduaren erdigunea izan zen XIX. eta XX. mendeen zati handi batean, eta horren erakusle da kontzertu honen egitaraua: batetik, haren barruan garatu ziren talentuen erakusle eta, bestetik, frantsesak izan ez arren, ezinbestean Parisera joan behar izan zuten haiena.

Parisko soinuen barrenera eginiko bidaia honetan Lionel Bringuier (Niza, 1986) dugu zeremonia-maisua; zuzendari goiztiarra izan zen, Parisko Kontserbatorioan graduatu berritan hasi baitzen lanean zenbait orkestra garrantzitsurekin, Los Angelesko Orkestra Filarmonikoarekin, besteak beste. Bringuier musika frantseseko espezialista handia da, gainera, bere diskografiak ongi erakusten duen moduan, non Ravel, Saint-Saëns, D'Indy eta Berlioz ikusiko ditugun.

Kontzertuaren lehen zatiko pieza nagusia Camille Saint-Saënsen Biolontxelorako 1. kontzertua izango da, Jonathan Roozemanek interpretatuko duena. Herbeheretar-finlandiar gazte honen karrerak 2015ean hartu zuen abiada, prestigio handiko Moskuko Txaikovski lehiaketa irabazi zuenean, eta debuta egin du jada itzal handiko zuzendariekin (Valery Gergiev, Esa-Pekka Salonen eta Sakari Oramo). 

Kontzertuaren bigarren zatian Georges Bizeten 1. Sinfonia nabarmentzen da, autore frantziarraren sorkuntza ez-operistikorik ospetsuena. Bizetek kontserbatorioko azken urtean konposatu zuten ariketa akademiko gisa eta, estreinatu ondoren, argitaratu gabe egon zen 1935 urtera arte.

Kontzertuaren lehen eta bigarren zatiak irekiko dituzte, hurrenez hurren, Gabriel Fauréren Masques et bergamasques eta Felix Mendelssohnen Hebridak obrak.

Sarrerak salgai (10€tik 35€ra). Kontzertu honetarako sarrerak salgai daude euskadikoorkestra.eus webgunean eta Baluarte Auditoriumen webgunean zein leihatilan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Egitaraua

Gabriel Fauré:
Masques et bergamasques [14’]

Camille Saint-Saëns:
Biolontxelorako 1. kontzertua [19’]

Felix Mendelssohn:
Hebridak [11’]

Georges Bizet:
1. Sinfonia [27’]

Lionel Bringuier, zuzendaria
Jonathan Roozeman, biolontxeloa
Euskadiko Orkestra Sinfonikoa

Aldaketa kontzertuaren egitarauan

Hasiera batean Edo de Waart herbeheretarrak (Amsterdam, 1941) zuzendu behar zuen kontzertu hau, baina osasun-arrazoiengatik bertan behera utzi behar izan du bertan parte-hartzea eta, haren tokian, Lionel Bringuierrek hartuko du batuta. Arrazoi beragatik programak aldaketa gutxi batzuk izan ditu, nahiz eta hasieratik aurreikusitako Parisko gaiarekiko leial mantendu den.

Informations additionnelles