Musika Gelaren baitan datozen hilabeteotan burutuko diren jarduerak aurkeztu berri dira

Euskadiko Orkestra Sinfonikoak bere MUSIKA GELAren programazioa aurkezten du. Publiko ororentzat Musika Familian zikloa, Eskola Kontzertuak haur hezkuntza, lehen hezkuntza eta derrigorrezko bigarren hezkuntzako ikasleentzat, ikastetxeei zuzendutako beste hainbat jarduera, horien artean ikastetxeetan tailerrak eta Orkestraren egoitzara bisitak, Sinfokids eta kultur zein gizarte erakunde ezberdinekin elkarlana dira Euskadiko Orkestraren Hezkuntza Departamentuak burutzen duen lanaren oinarri nagusiak. Hau guztia MUSIKA GELA markarekin helarazten zaio publikoari. Denboraldi honetan hogeita hamar jarduera baino gehiago izango dira familiarteko publikoarentzat eta hezkuntza arloarentzat eskuragarri.

Musika Familian eta Eskola Kontzertuak. Azken sei urteotan Euskadiko Orkestrak haur eta gazteei eskainitako kontzertuek 41.000 pertsona bildu dituzte guztira. 2013ko urria eta abenduan, Eskola Kontzertuen baitan, lehen eta bigarren hezkuntzako 2000 ikasletik gora izan ziren EOSen egoitzako eserlekuetatik "Serenata" eta "Gerra eta Pakea" ikuskizunekin gozatzeko aukera izan zutenak; orain, otsailaren 18tik 20ra, "Barrok... ino" Orkestraren eta Paraíso Antzerkiaren ekoizpenak 2 tik 6 urte bitarteko 800 haur erakarriko ditu egoitzako auditoriora; horrela osotuko da aurtengo denboraldirako aurreikusitako 12 kontzertu-multzoa. Ondoren Musika Familian zikloaren txanda izango da, aurten Donostia eta Gasteizen izateaz gain, Pirritx, Porrotx eta Marimototsekin batera "Sentitu, pentsatu, ekin!" ikuskizunaren bertsio sinfonikoaren eskutik Bilbo eta Iruñeara ere helduko dena. Denboraldia osotuz, "Barrok... ino" eta "Gerra eta Pakea" ekoizpenak, familiarteko ikuslegoari irekita oraingoan, eta "Sinfokeritan/Sinfoneando", Sinfokids ikus-entzunezkoan oinarri harturik ikuslegoarekin interakzioa funtsatzat duen muntaia.

Musika Familian ziklorako sarrerak salgai daude jada eta www.kutxabank.es webgunean, aretoetako leihatiletan eta beste ohiko salmentaguneetan eros daitezke. Gasteizen izan ezik, han izango diren kontzertu guztietarako sarrerak salgai jarri eta egun gutxitara agortu baitziren.

Programatutako hogeita hamar jarduerez gain, Orkestraren Hezkuntza Departamentuak bere beharrei egokituta diseinatutako jarduerak eskaintzen dizkiete ikastetxeei, esaterako Euskadiko Orkestra Sinfonikoaren jarduna gertutik ezagutzeko egoitzara bisitak, Musika Familian zikloko kontzerturen batera joango diren ikastetxeetan tailerrak burutzea eta, horretaz gain, Musika Familian zikloko hainbat kontzerturen aurretik egiten diren Sentsibilizazio Tailerrak ere jartzen ditu abian. 2008 urtetik gaurdaino, 2600 pertsona izan dira bisita eta tailer hauetan esku hartu dutenak. Ekimen guzti hauek burutzeaz gain, FEVAS-ekin lankidetzan ezintasun intelektuala duten pertsonen integrazioaren alde lanean dihardugu aurten ere eta Euskadiko Orkestraren Musika Gelak sortutako ekoizpenek, "Biola ez dago bakarrik" eta "Tantantxo/Plok, Plok, Plic" muntaiek alegia, beren ibilbidean aurrera darraite estatuko beste hainbat orkestra sinfonikoek haurrei eskainitako programazioetan barrena eta baita nazioarte mailan ere.

Bere egitekoa burutzeko, Euskadiko Orkestraren Hezkuntza Departamentuak, zubiak eraikitzeak ematen duen aberastasunean sinetsita eta herria eraikitzeko asmoz, gure inguruko beste kultur zein gizarte erakundeekin bat egiten du. Honela, Euskadiko Orkestraren lankide dira Donostia eta Gasteizko udalak, Kursaal Eszena, EITB, Eusko Jaurlaritzako Hezkuntza Sailburuordetza, Adimen Ezintasuna dutenen aldeko Elkarteen Euskal Federazioa (FEVAS), Euskal Herriko Goi Mailako Musika Ikastegia (Musikene) eta Paraíso Antzerkia.

Informations additionnelles