Euskadiko Orkestra eta Malandain Ballet Biarritz Château de Versailles Spectacles-en denboraldian

Euskadiko Orkestra Sinfonikoak eta Thierry Malandainek zuzentzen duen Malandain Ballet Biarritzek La Belle et la Bête (Ederra eta Piztia) ikuskizunaren eszenaratzea aurkezten dute, Donostia 2016 Europako Kultur Hiriburuaren laguntzarekin. Muntaia hau bi erakunde hauen arteko hirugarren lankidetza da eta Orkestraren itzulera da Versailleseko Jauregiko Opéra Royal delakora, bertan debuta egin eta bi urtetara. Parisera bidaiatu aurretik, abenduraren 5ean eta 8an Ederra eta Piztia Biarritzeko Gare du Midin, Malandain Ballet Biarritzen egoitzan izango da. Ondoren, hilaren 11, 12 eta 13an Opéra Royal antzokira helduko da. Eta 2016an, urtarrilaren 28tik otsailaren 4ra, Ederra eta Piztia Bilbo (Euskalduna Juaregia), Iruña (Baluarte Auditorioa) eta Donostian (Kursaal Auditorioa) interpretatuko da, Euskadiko Orkestra Sinfonikoaren Abonu Denboraldiaren baitan.

Berriro Euskadiko Orkestraren eta Malandain Ballet Biarritzen arteko pas de deux urratsa. Aurrez 2011n Magifique eta 2013an Cendrillon ikuskizunek merezitako arrakasta itzelaren ondoren dator Ederra eta Piztia. Horietan Thierry Malandainen koreografiei Euskadiko Orkestrak, hurrenez hurren, P.I. Tchaikovsky eta S. Prokofieven musika gehitu zien zuzenean. EOS eta Maladain Ballet Biarritzek berriz ere bat egin dute, Donostia 2016ren Elkarrizketak ildoaren baitan. Programazio-lerro hau tokiko kultur-programatzaileekin batera berariazko proiektuak sortzera bideratuta dago, xede izanik DSS2016EUren balioak hedatzea.

Orkestraren eta Frantziako 19 zentro koreografiko nazionaletako bat den Balletaren arteko harreman estua artistikoki oso baliozkoa da eta horregatik Donostia 2016k ez-bairik gabe bat egin du haiekin. Elkarlan horrek osagarriak diren jarduerak garatzen dituzten kultur erakundeen artean sinergiak sortzeak duen garrantzia azpimarratzen du, sinergia hoiek gerora eszenatoki garrantzitsuenetan aurkeztuko diren maila goreneko sorkuntzen garapena ahalbidetzen baitute, gure kulturaren eta bide batez gure gizarte osoaren ordezkaritza onena bilakatuz.

Château de Versailles Spectacles erakundearen Musika Denboraldia europar zirkuituko programazio zorrotzenetako bat da. Irailetik ekainera bitartean, 70 bat ikuskizun biltzen ditu, Opéra Royal antzokian eta Versalleseko Jauregiko espazio ezagunenetan. Kontzertu sinfonikoak, operak, balletak, errezitalak eta abar izaten dira eta aurten, Malandain Ballet Biarritz eta Euskadiko Orkestraz gain, ariko dira Sir John Elliot Gardiner, Les Arts Florissants eta William Christie, Hesperion XXI eta Jordi Savall. Anne-Sophie Mutter, Lang Lang, Mark Minkowski, Münchner Rundfunkorchester, Joyce DiDonato, Cecilia Bartoli, Gabrieli Consort and Players eta Paul McCreesh, Alexandre Theraud, eta abar.

Informations additionnelles