Jeudi 20 novembre, 2025

Euskadiko Orkestrak eta OBCk elkarrizketa sinfonikoa izango dute Pirinioen bi aldeetan

Euskadiko Orkestra eta Orquestra Simfònica de Barcelona i Nacional de Catalunya.

Euskal Herriko eta Kataluniako orkestrak elkarren artean trukatuko dira datorren astean.

Euskadiko Orkestrak ‘Sorozabal / Mahler’ kontzertu-programa eskainiko du azaroaren 24 eta 25ean Gasteizen eta Iruñean, eta ondoren Bartzelonako L’Auditorira eramango du azaroaren 28, 29 eta 30ean.

Kataluniar egileez gain Debussy eta Ravelen klasikoak barne hartuko dituen programa batekin, Orquestra Simfònica de Barcelona i Nacional de Catalunyak (OBC) Bilbo bisitatuko du azaroaren 26an eta Donostia azaroaren 27 eta 28an. Azken egun horretan, bi orkestrak gurutzatu egingo dira eta aldi berean eskainiko dute kontzertu bana.

Euskadiko Orkestrak eta Orquestra Simfònica de Barcelona i Nacional de Catalunyak (OBC) elkartrukea egingo dute berriro 23 urteren ostean eta modu sinbolikoan egingo dute gainera Ravel Pirinioen bi aldeetara eramanez: Euskadiko Orkestrak Ziburuko konpositorearen Alborada del graciosorekin hasiko du trukaketa eta OBCk bere kontzertu-programa itxiko du Ravelen Bolero ospetsuarekin.

Bi orkestrek prestatu dituzten programek barne hartzen dituzte, bi obra ezagun horiez gain, Sorozabalen euskal musika; Mompou, Albeniz, Gerhard eta Miquel Oliuren –Pluja obra estreinatu berriarekin– musika kataluniarra; Debussyren musika frantsesa; eta Mahlerren musika alemaniarra.

Euskadiko Orkestra ‘Sorozabal / Mahler’-ekin Bartzelonan

Euskadiko Orkestrak ekingo dio elkartruke honi kontzertuak eskainiz, Gasteizen eta Iruñean lehendabizi, eta Bartzelonako L’Auditorin ondoren, Kataluniako hiriburura historian egingo duen zazpigarren bisita izango den honetan. Antonio Mendezek, nazioarteko proiekzio handiena duen zuzendari espainiarretako batek, zuzenduko du Euskadiko Orkestra kontzertu-programa honetan. Korronte estetikoen kontraste iradokitzailea sortuko duen euskal programa eskainiko du. Alde batetik, Maurice Ravelen hedonismo soinudun frantziarra izango da entzungai. Haren Alborada del gracioso lana Andaluziako ukituz beteta dago, orkestrako paleta finarekin. Bestalde, gainera, Pablo Sorozabalen lanaren inspirazio-iturri izan zen tradizio alemaniarra (Leipzigen eta Berlinen jaso zuen prestakuntza) ere suma daiteke. 1929an idatzitako 7 Lieder lanak Europaren erdialdeko arkitektura harmonikoa eta kontrapuntistikoa Euskadiko folklore eta hizkuntzarekin bateratzen dira. Fusio hori eskaintzeko interpretatzaile ezin hobea izango da Sofia Esparza soprano nafarra. Programa Gustav Mahlerren sorkuntza-lan tragikoenetako batek osatuko du: 5. Sinfoniak. Sinfonia hilzorian utzi zuen hemorragia baten ostean idatzi zuen. Osatzen ari zela, esnatzeari buruzko sinfonia hau idatzi zuen. Hasiera tronpetarekin jotako solo aztoragarri batek ematen dio.

Kontzertuak

Azaroak 24 (19:30): Jesus Guridi Kontserbatorioa (Gasteiz)
Azaroak 25 (19:30): Baluarte Auditoriuma (Iruña)
Azaroak 28 (19:00): L’Auditori (Bartzelona)
Azaroak 29 (19:00): L’Auditori (Bartzelona)
Azaroak 30 (11:00): L’Auditori (Bartzelona)

Programa

M. Ravel: Alborada del gracioso [8’]
P. Sorozabal: 7 Lieder [16’]
G. Mahler: 5. Sinfonia [68’]

OBC ‘Mompou / Ravel’-ekin Euskadin

Orquestra Simfònica de Barcelona i Nacional de Catalunyak hirugarren aldiz bisitatuko du Euskadiko Orkestraren Denboraldia, lehenengo biak 1999an eta 2002an izan ziren. Orain bere zuzendari titularrarekin aurkeztuko da, Ludovic Morlot frantsesarekin, eta Nuria Rial soprano kataluniarrarekin batera. Programak barne hartuko ditu Debussyren (Prélude à l’Après-midi d’un faune) eta Ravelen (Bolero) lan enblematikoak –OBC ziburutarraren obra guztien sorta ari da grabatzen 6 diskotan–, baita Parisen bizitako egile kataluniarren musika ere, Mompou (Cinc cançons populars catalanes) eta Albenizena (The Magic Opal, suite). Gerharden (Els ballaires dins un sac) eta Miquel Oliu bartzelonarrak estreinatu berri duen bere azken sorkuntzaren, Plujaren, interpretazioarekin osatuko da programa. Errepertorio honek pasa den larunbatean Hanburgoko Elbphilarmonieko publikoa erakarri zuen, OBCk Alemanian barrena egindako biraren baitan, eta euskal publikoa ere liluratzea espero da.