KlasikAT abian jarriz, Michel Camilok Orkestrarekin batera eksiniko dituen kontzertuak aurkeztu berri dira

Euskadiko Orkestra Sinfonikoa etengabe saiatzen da entzulego berriak erakartzen eta, bide batez, bere musika gizarte osora zabaltzen. Ahalegin horren emaitza gisa, Orkestrak kontzertu-ziklo berri bat aurkezten du:KlasikAT. Asmo handiko egitasmo honek, zikloaren izenak berak adierazten duen moduan, Orkestra beste ikuspegi batetik entzuteko gonbitea luzatzen du, musika klasikotik aldenduz bestelako generoez gozatzeko gonbitea alegia. Horretarako Euskadiko Orkestrak nazioarte mailako artista gailenak hartu ditu bidelagun.

Zikloari hasiera emateko, irailaren 7a eta 10a bitartean Michel Camilo jazz latindarreko pianojotzaile eta konpositorea Orkestrarekin batera arituko da Bilbo, Iruñea, Donostia eta Gasteizen. Lau kontzertu hauek Orkestrak Miramonen duen egoitzan aurkeztu dira prentsaurreko batean eta bertan izan dira Iñigo Alberdi, Orkestraren zuzendari nagusia, Michel Camilo bera, kontzertuak zuzenduko dituen Rubén Gimeno maisua eta Olaz Basagoiti, kontzertuen babesle den Euskaltel erakundearen ordezkari gisa.

2011ko ekainan, berriz, Oscar baten irabazle gertatutako Jorge Drexler uruguaitar kantautoreak Orkestrarekin lau kontzertu emango ditu Fernando Velázquez zuzendari zein musikagilearen zuzendaritzapean.

Sarrerak salgai daude ohiko bideetan eta auditorietako leihatiletan 15€ko prezio bakarrean.

Informations additionnelles