Judith Jáuregui pianojotzailea Euskadiko Orkestraren 3. Abonu-programaren protagonista

Azaroaren 7, 8 eta 9an Orkestrak denboraldiko hirugarren Abonu-programari dagozkion kontzertuak eskainiko ditu. Wolfram Christek zuzenduta, Judith Jáuregui donostiar pianojotzaile gaztea estreinako aldiz arituko da Euskadiko Orkestrarekin. Ibilbide nabarmena burutzen ari den bakarlari honek Mozarten Piano eta orkestrarako 20. kontzertua interpretatuko du. Vienatar tximistak izenburua duen programa osotzeko, Salzbourgeko konpositorearen Flauta miresgarria operaren obertura eta 39. Sinfonia izango dira entzungai.

Judith Jáuregui (Donostia, 1985) bihar osteguna hasiko da Euskadiko Orkestrarekin entseatzen, honek Miramonen duen egoitzan. "Schumann, txikia denaren artea" bere lehenbiziko diskak kritika espezializatuarengandik jasotako laudorieok lagunduta dator, digitazioan ziurtasuna, formaren ezagutza edo baitaratze poetikoaren eta espresio-freskotasunaren arteko konbinazio erakargarria goraipatu dituztelarik. Orain Mozarten obran murgidurik, EOSekin debuta egiterakoan Piano eta orkestrarako 20. kontzertua interpretatu aurretik, Madrilgo Juan March Fundazioan errezital bat eskaini berri du. Jeinuzko konpositore honen lanari heltzerakoan, Judith Jáureguik "Mozart dionisiakoa, bizia, garratza" defendatzen du. Judithen beraren hitzetan, "estiloa errespetatu behar da,bai noski! Baina ez da zertan akamikoegia izan behar. Jolasteko aukera ematen duen musika da. Fantasiaren munduan sartzeko aukera izateko, zurruntasuna baztertu behar da". Guzti honen emaitza azaroaren 7tik 9ra bitartean Orkestrarekin batera eskainiko dituen kontzertuetan gozatzeko aukera izango dugu.

Kontzertuen hitzaurre modura, azaroaren 5ean Miramongo Matinéeak zikloak publikoari irekiko dizkio programa honen entsegu orokorreko ateak. Mozarten partiturak auditorioetan entzungai izan aurretik, Orkestrak kontzertu bat nola eraikitzen duen ezagutzeko aukera berri bat izango da hau, berau osatzen duten indibidualitateak batu eta orkestra osoa nola osatzen den ezagutzeko, alegia. Judith Jáuregui eta Wolfram Christ maisua EOSekin batera entzuteko lehenbiziko aukera izango da gainera.

Wolfram Christek zuzenduko du III. Musika Laborategia. Egunotan zuzendari gonbidatu gisa Euskadiko Orkestra zuzentzeaz gain, Wolfram Christek biolajotzaileei zuzentzen zaien III. Musika Laborategia zuzenduko du. Izan ere, orkestra zuzendari gisa aritu aurretik, hogei urtetik gora Berlineko Orkestra Filarmonikoaren biola bakarlari izan zen Christ. Beren ibilbide profesionalaren lehen urratsetan musikari gazteei laguntzeko sortutako ekimen honi esker, Musikeneko biola ikasle-talde batek nazioarte mailako interprete arrakastatsuenetako batekin lan egiteko aukera izango du.

Informations additionnelles