Brahms berreraikitzen: Miramongo Matinéen XXII. Denboraldiko lehenbiziko emanaldia

"Brahms bakarrik" kontzertuak irekiko du Miramongo Matinéeak zikloaren XXII. denboraldia irailaren 28 larunbatean. Euskadiko Orkestraren baitan sortutako Ensemble Dionysus taldeak Johannes Brahmsen Pianorako kintetoa fa minorrean, opus 34 izango du hizpide. Baina partitura hau bere jatorrizko bertsioan berreskuratu du Dionysos Ensemble taldeak, bi biolontxelodun hari boskoterako, alegia, Anssi Karttunen (1960) finlandiar biolontxelojotzailearen eskutik. Ensemble Dionysus Irene eta Izaskun Echeveste, biolinak; Delphine Dupuy, biola; eta Juan Ignacio Emme eta Jon Larraz, biolontxeloak, osatzen dute.

Johannes Brahmsek (Hamburg, 1833ko maiatzak 7 - Viena, 1897ko apirilak 3) Anne de Hesse Printzesari eskainitako jatorrizko pieza 1864ko udan amaitu zuen. Egun pianorako kinteto moduan ezaguna, hasiera batean obra hari kintetoa izan zen, bi biolin, bi biola eta bi biolontxelorako konposatua; 1862ean amaitu zuen. Baina Brahmsek hari boskoterako jatorrizko partitura hori suntsitu eta boskotea transkribatu egin zuen, bi pianorako sonata bilakatu zuelarik. Forma honekin opus 34 bis bezala argitaratu zen, behin betiko forma hartu aurretik. Larunbatean Euskadiko Orkestraren Miramongo egoitzan entzungai izango duguna jatorrizko sorkuntza balizkoaren berregitea da. Ezagutzen dugun partituraren indarra eta bizkortasuna gordetzen ditu, baina aldi berean sonoritatea eta tinbrea bestelakoak ditu oso.

Kontzerturako sarrera solteek 7€ko prezio bakarra dute eta www.kutxabank.es webgunean, Kursaal Auditorioko leihatilan EOS edo Kursaal Fundazioaren emanaldi egunetan eta, aforo librerik balego, Orkestraren egoitzako leihatilan bertan erosi ahalko dira. Era berean, salgai daude halaber Miramongo Matinéen Denboraldia osatzen duten 16 kontzertuetarako abonuak, bakoitzak 79€ko prezioa du eta 61€koa tarifa bereziko onuradunentzat; hauek Orkestraren bulegoetako telefonora deituz (943 01 32 32) edo inprimaki hau bidaliz eskura daitezke.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. Matinéea dagoen egunetan bakarrik erabilgarri den garraiobide hau 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.