Alexander Lonquich, lehenbiziko aldiz Euskadiko Orkestraren Denboraldian

Apirilaren 14tik 21era, Euskadiko Orkestra Sinfonikoak kontzertu-programa berri bat eskainiko du ohiko lau hiriburuetan. Oraingoan egungo pianista nabarmenetako bat, Alexander Lonquich alemaniarra bakarlari gonbidatu izatea izango du akuilagarri. Kontzertuak Christoph Königek zuzenduko ditu; Luxemburgeko Solistes Européens delakoaren zuzendari artistiko eta Real Philharmonia de Galicia orkestrako zuzendari printzipal gonbidatua, 2013an estreinakoz bertan jardun ostean dator berriz ere Euskadiko Orkestraren denboraldira.

Kontzertuak izango dira apirilaren 14 eta 15ean Donostiako Kursaalean, 19an Iruñeako baluarten, 20an Bilboko Euskaldunan eta, amaitzeko, hilaren 21ean Gasteizko Principal Antzokian.

Alexander Lonquich nazioarte mailan pianista zein zuzendari gisa da ezaguna eta gaurdainoko ibilbidea Europako areto nahiz jaialdi ospetsuenetan ez ezik, Estatu Batuetan, Australian eta Japonian ere burutu du. Bakarlari moduan, Vienako Orkestra Filarmonikoaren, Royal Philharmonic Orchestra eta Zuricheko Tonhalle orkestraren lankide izana da; zuzendari izan dituenen artean, Claudio Abbado edo Mark Minkowski. Ganbera-musika ere lantzen du eta alor horretan Joshua Bell, Renaud eta Gautier Capuçon, Steven Isserlis, Leonidas Kavakos, Heinrich Schiff eta abar izan ditu lagun. EMI disko etxearentzat egindako grabaketek hainbat sari merezi izan dituzte: Diapason d'Or Frantzian, Abbiati Italian, Edison Holandan eta abar. Euskadiko Orkestrarekin debuta egiteaz gain, denboraldi honetan zehar burutuko dituen proiektuen artean daude NDR Symphony Orchestra-ren artista egoiliar izatea eta Estatu Batuetan barrena bira bat burutzea.

Euskadiko Orkestra Sinfonikoarekin eskainiko dituen lehenbiziko kontzertuetarako, Lonquichek Chopinen Pianorako 2. kontzertua aukeratu du. Egileak berak pianoa joz bere dohainak erakusteko sortua, partitura horrek bakarlariaren ezaugarri nabarmenenak ustiatzen ditu.

Sibelius eta Beethoven, kontzertua ireki eta ixteko. Orkestrak lehenbiziko aldiz interpretatuko du Jean Sibeliusen 7. Sinfonia, finlandiarraren azken lan sinfonikoa. Eta bigarren zatian Beethovenen Bosgarren Sinfonia ezaguna izango da entzungai.