Gaurko eta biharko kontzertuekin, Katia eta Marielle Labèque-ek, Orkestraren Abonu Denboraldiko 3. kontzertu-programa osatuko dute

Gaur astelehena eta biharko kontzertuak izango dira Katia eta Marielle Labèque piano duoak Euskadiko Orkestra Sinfonikoaren Denboraldiko 3. programaren baitan emango dituzten azkenak. Emanaldi-programa abenduaren 2 ostiralean abiatu zen Donostiako Kursaalean; hilaren 5ean jarraitu zuen Bilboko Euskalduna Jauregian eta 7an Orkestra Kursaalean izan zen berriz ere. Gaur Gasteizko Principal Antzokian izango den emanaldiaren ondoren, kontzertu-programa hau itxiko da bihar asteartea, abenduaren 13an Iruñeako Baluarten.

Katia eta Marielle Labèque ahizpa lapurtarrek "ezin sailka daitezkeen bi pianista inkonformista" modura aurkeztu dute beren burua eta "kontraesan batzuk eta sorpresak ezkutatzen dituen" errepertorioa da berea. Haien interpretazioek musika estilo desberdinen nahastea dute eta Bach, Brahms, Liszt eta Mozarten tankerako klasikoetatik XX. mendeko "klasikoetara" jauzi egiten dute, Stravinsky, Bernstein, Takemitsu eta Lutoslawski musikagileen lanetara, esaterako. Hala, Thomas Adès edo horientzat konposatu duen Philip Glass-en tankerako musikagile garaikideek ere tokia dute bi ahizpen interpretazioetan. Ezagunak dira, halaber, pop-rock izarrekin lankidetzak, Sting edo Madonnarekin egindako lana, esaterako. Gertuagokoa zaigu Kalakan taldearekin elkarlana; besteak beste, txalapartaren hotsa pianoenarekin uztartu zuten Ravelen Boleroan. Euren disko etxearen bidez (KML Recordings), eta nazioarteko zigiluen eskutik (Deutsche Grammophon) garatutako diskografiak islatzen du baita ere Katia eta Marielle Labèquen lanen eklektizismoa. Aurrez aipatu konpositoreen izenez gain, askotariko artisten izenak ere irakur daitezke kredituetan: Patti Smith, Daniel Day-Lewis, Mayte Martín, Il Giardino Armonico eta abar. Infomazio gehiago www.labeque.com webgunean.

"Frantziako irudiak" izenburudun egitaraua. Poulencen Bi pianorako kontzertuaren hitzaurre gisa, beste musikagile frantziar baten obra bat joko du, Camille Saint-Saënsena, hain zuzen ere. Horren Suite Algérienne izango da entzungai. Eta kontzertua ixteko, Claude Debussyren Images, hau da, Irudietako bi: Ibéria eta Rondes de Primtenps. Euskadiko Orkestrak bere zuzendari titular Jun Märkl izango du gidari frantziar kutsu nabarmena duen egitarau honi aurre egiteko. Izan ere, itzal handia du alemaniar zuzendariak frantziar errepertorioari dagokionean.

Gasteizko Principal Antzokiko kontzerturako sarrerak agortuta daude, baina Iruñeako Baluarten izango den azken emanaldirako tiketak eros daitezke webgune honetako TICKET atalean edo Baluarteko ohiko salguneetan.