“GERNIKA 80”, bonbardaketaren urteurrena gogoratuko dute Matinéetan Kaabestri Ensemblek eta Gorka Hermosa soinujoleak

Apirilaren 29 larunbatean, Miramongo Matinéek ere gogora ekarriko dute Gernikako bonbardaketaren 80. urteurrena, Euskadiko Orkestrako musikariek osatutako Kaabestri ganbera taldearen eta Gorka Hermosa akordeoijotzaile eta konpositorearen eskutik. Aukera aparta izango da gainera estreinako aldiz Matinéetan ariko den musikari urretxuarraren konpositore- zein bakarlari-jardunaz eta akordeoiaren eta hari-boskotearen bat-egiteaz gozatzeko.

Gorka Hermosaren "Gernika, 26/04/1934", "Neotango" eta "Four dances from Iberia" joko dituzte.

Gorka Hermosa (Urretxu, 1976) soinujotzaile eta konpositoreari buruz, zera esana du Astor Piazzollaren pianista ohi Pablo Zinger-ek: "Gorka Hermosaren musikak berehala liluratu ninduen; horren orijinaltasunak, giroak eta birtuositateak xarmatu ninduten. Crossover hitza errealitate bizi eta txundigarri bilakatzen du. Gertutik jarraitu beharreko talentua da". Hermosa RTVE orkestrarekin aritu zen lehenbizi, eta ondoren beste zenbait orkestrekin aritu da bakarlari. Kontzertuak eman ditu Txina, Amerika eta Europan. Konpositore gisa, akordeoi eta orkestrarako bere lanak Estatu Batuetako, Finlandiako edo Errumaniako orkestrek jo dituzte. 2013an eta 2014an "CIA IMC-UNESCO Composition" saria eman dio Confederation lntenationale des Accordeonistes erakundeak, akordeoirako idatzitako urteko obra onenari. Bost CD argitaratu ditu eta gehin bat berak sortutako lanak biltzen dira horietan.

Kaabestri, beti abangoardiarekin eta muga estilistikoen muturreko musikekin konprometitutako ensemblea Euskadiko Orkestra Sinfonikoaren baitan sortu zen. Lankide izan ditu Andoni Mercero, Rafael Amargo, Raphael Christ, Gonzalo Tejada, Xabier Zabala, Glen Hansard, Dan Forrest... hainbat kontzertu zein disko-grabaketatan. Lantzen duen errepertorio anitzera moldatzeko, Kaasbestrik eraldatu egiten du bere organikoa proiektu batetik bestera. Oraingoan, hari-boskotea izango da Gorka Hermosarekin batera ariko dena. Berau osatzen dutenak dira Oscar López eta Igor Torre biolinak, Arkaitz Martínez biola, Jon Larraz biolontxeloa eta Arkadiusz Maciejski kontrabaxua; guztiak Euskadiko Orkestra Sinfonikoko kideak dira.

Sarrerak. Matinée guztietarako sarrerak TICKET atalean eta www.kutxabank.es webguneetan eta Kursaal zein Orkestraren egoitzako leihatiletan eros daitezke. 7 euroko prezio bakarra dute.