Euskadiko Orkestra Sinfonikoak Toshio Hosokawa konpositore garaikidearen disko monografikoaren bigarren zatia grabatuko du.

Maiatzaren 8 astelehenetik ostiralera bitartean Abonu Denboraldian interpretatu ostean, Euskadiko Orkestra Sinfonikoak Toshio Hosokawaren (Hiroshima, 1955) "Klage", mezzo eta orkestrarako, eta "Autumn Wind", shakuhachi eta orkestrarako, grabatuko ditu. Grabaketa saioak Orkestraren Miramongo egoitzan izango dira larunbatean hasi eta datorren asteartera bitartean. Toshio Hosokawa gaur helduko da Euskadira; bertan, gaur Gasteizen eta bihar Donostian izango diren Abonu kontzertuetara joan eta bere lanen grabaketara bertaratuko da. Orkestrak bere zuzendari titular Jun Märklen aginduetara egingo du grabaketa hori; eta bakarlari ariko dira Mihoko Fujimura eta Tadashi Tajima. 

Monografiko honek bilduko ditu, halaber, "Meditation. To the Victims of Tsunami" eta "Nach dem Sturm", azken hori bi soprano eta orkestrarako, Hermann Hesse-ren testuak oinarri hartuta. Bi lan horiek 2016ko abenduan grabatu zituen Orkestrak bere egoitzan, orduan ere Jun Märklek zuzenduta eta Susanne Elmark eta Ilse Eerens sopranoak bkalari gonbidatu jardun zuten.

Euskadiko Orkestraren disko berri honen garrantzia datza, batetik, Toshio Hosokawaren nazioarteko ospean (bera da azken hamarkadetako musika garaikidearen erreferente nagusienetako bat) eta, bestetik, bildutako musikalanak estreinako aldiz grabatuak izatean. Ekimen horrek emango dio amaiera gainera Orkestrak denboraldi honetan zehar Eu Japan Fest erakundearen laguntzarekin, Donostia 2016ren eskutik, gauzatzen ari den Hosokawa Proiektuari. Diskoa Naxos disko etxeak argitaratuko du eta berau arduratuko da nazioartean zabaltzeaz.

Euskadiko Orkestra Sinfonikoaren zuzendari titular Jun Märklek lotura zuzena du Japoniako musika eta kulturarekin. Bere ama japoniarra da eta herrialde horrekiko oso harreman estua du, arlo pertsonalean zein profesionalean. Han, Osakako Orkestra Filarmonikoa, New Japan Philharmonic, Yomiuri Nippon Symphony Orchestra, Tokyo Nikikai opera edo Kunitachi Musika-eskola ospetsuaren orkestra zuzentzen ditu askotan. Izan ere, ekainaren bukaeran Osaka eta Tokion ariko da berriz ere.

Euskadiko Orkestra Sinfonikoak esku artean duen nazioarteko musika garaikidearen inguruko proiektu berri hau gehitzen zaio aurrez burututako hainbati, horien artean Tesela (besteak beste, P. Eötvos, M, G. Pesson edo I. Fedeleren obrak biltzen dituena) eta Sofia Gubaidulinaren ekoizpen sinfonikoaren lagin bat biltzen duen diskoa.

Saint Saëns, Naxos etxearentzat halaber. Toshio Hosokawren lanaren inguruko monografiko honetaz gain, Euskadiko Orkestrak Camille Saint-Saëns musikagile frantziarraren zenbait lan biltzen duen diskoa grabatu du Naxos etxearentzat.