Irauli boskoteak emango dio hasiera Miramongo Matinéeen ziklo berriari

Larunbat honetan, irailak 29, 11:00etan, Euskadiko Orkestra Sinfonikoaren Miramongo Matinéeen 2018/2019 Denboraldia abiatuko da Orkestraren Miramongo egoitzan. Euskadiko Orkestra Sinfonikoaren ganbera-musika zikloak 27 urte beteko dituen honetan, Irauli boskotea izango da kontzertu-sorta berria irekitzearen arduraduna.

Kontzertuaren programak Erromantizismoaren garaia jorratuko du. Arte-mugimendu hau XIX. mende hasieran sortu zen, gizartea industria eta ekonomiaren alorretan izugarrizko eraldaketa bizitzen ari zen unean. Garai honetako hiru konpositoreren lanak joko dituzte errezital honetan: Bernhard Crusell, Juan Crisóstomo de Arriaga eta Anton Reicha.

Matinéea Bernhard Crusellen Divertimentoarekin hasiko da. Finlandiar klarinetista ospetsu honek eragin nabarmena izan zuen bere instrumentuaren garapenean, hainbat obra konposatu baitzituen garairako berriak ziren baliabide teknikoak erabiliz. Crusellek Parisen konposizioa ikasi zuen eta Europa osoan interprete gisa ospea eskuratu zuen.

Entzungo dugun hurrengo obra Juan Crisóstomo de Arriagaren 3. Hari-kuartetoa izango da. Bere bizitza oso laburrean —hogei urte zituela hil zen—, hainbesteko aintzatespena izan zuen, ezen 18 urte zituenean Pariseko Kontserbatorioko irakasle izendatu baitzuten. Hiru hari-kuarteto dira bera bizi zela argitaratu ziren bere obra bakarrak. Bere estiloa Klasizismoaren eta Erromantizismoaren arteko mugan koka daiteke, eta zenbait antzekotasun ditu Beethovenen gaztaroko musikarekin.

Matinéea amaierara iritsiko da Anton Reicharen Oboe- (edo klarinete-) boskotea eta hari-kuartetoarekin. Txekiar jatorridun eta nazionalitate frantsesdun konpositore eta flautajole hau Bonnera joan zen bizitzera txikitan. Bertan konposizioa ikasi zuen Haydn eta Salierirekin, Beethoven ezagutu zuen, eta haren lagun egin zen betiko. Aurrerago, Pariseko Kontserbatorioko konposizio-irakasle izan zen eta izan zituen ikasleen artean aipagarriak dira Berlioz, Liszt, Franck eta Gounod. Haize-boskoterako musika sortu zuen lehen musikagileetako bat izateagatik da ezaguna gaur egun.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Irauliko kideen argazkia (egin klik argazkia jaisteko)

Informations additionnelles