Euskadiko Orkestrak eta Donostiako Orfeoiak Mahlerren ‘2. Sinfonia’ ikaragarria interpretatuko dute
Orkestra eta abesbatza lehen aldiz elkartuko dira Abonu Denboraldian pandemia hasi zenetik, ‘Berpizkundea' ezizenez ezagutzen den sinfonia handi hau berreskuratzeko. Orfeoiak bere aurkezpen-gutun gisa defendatu du mundu osoan zehar obra hau.
Robert Treviñok zuzendutako programa berri honetako kontzertu guztietarako sarrerak salgai daude: apirilaren 29an eta maiatzaren 2an Donostian, maiatzaren 3an Iruñean, maiatzaren 4an Bilbon eta maiatzaren 6an Gasteizen.
Kontzertu-programa berri honekin, Euskadiko Orkestrak 2020an bertan behera geratu zen obra bat berreskuratuko du: Gustav Mahlerren 2. Sinfonia. Eta duela bi urte aurreikusita zegoen bidelagun berberarekin egingo du, Donostiako Orfeoiarekin. Sinfonia hau Orfeoiaren aurkezpen-gutuna bilakatu da eta jaialdi ospetsu ugaritan abestu du, hala nola Luzernakoan, Claudio Abbadok zuzenduta. ‘Berpizkundea’ ezizenez ezaguna den sinfonia hau berreskuratzeak balio sinbolikoa handia du Euskadiko Orkestrarentzat.
Sei urte eman zituen konpositore bohemiarrak sorkuntza hori lantzen, eta bizitzaren eta heriotzaren inguruan sakonki hausnartzen du ordu eta erdiko iraupena duen obra horretan. Lan honekin Mahlerrek lehenbizikoz erantsi zion giza ahotsa sinfonia bati eta beste munduaren gaia jorratu zuen bere baitan. Bere geroko sinfonietako askotan oinarrizko bilakatuko ziren osagai horiek.
Programa honen kontzertuak orkestraren ohiko lau hiriburuetan egingo dira, guztiak 19:30ean: ostiral honetan eta datorren astelehenean, apirilak 29 eta maiatzak 2, Donostiako Kursaal Auditoriumean; asteartean, maiatzak 3, Iruñeko Baluarte Auditoriumean; asteazkenean, maiatzak 4, Bilboko Euskalduna Jauregian; eta ostiralean, maiatzak 6, Gasteizko Principal Antzokian. Principal Antzokiko eszenatokiaren tamainagatik Gasteizen orkestra murriztuarentzako bertsioari helduko dio orkestrak, Gilbert Kaplan & Rob Mathesena.
Robert Treviñok arrakasta handia lortu du nazioarteko agertoki garrantzitsu ugaritan Mahlerren lanak zuzentzen: haren musikarekin egin zuen debuta Municheko Orkestra Filarmonikoa zuzenduz (5. Sinfonia, 2016an) eta, horren ondoren, Londreseko Orkestra Sinfonikoa zuzendu zuen (zehazki, 3. Sinfonia, 2017an); azkenik, Mahler aukeratu zuen 2017ko urrian Euskadiko Orkestraren titular gisa eman zuen lehen kontzerturako, konkretuki, haren 1. Sinfonia. Programa berri honekin Treviño haratago joan da Euskadiko Orkestrarekin egiten ari den bidaia mahleriarrean, aurreko denboraldietan, 9. Sinfonia eta Lurraren kantaren buru izan ondoren.
Orkestrak eta bere titularrak, Orfeoiaz gain, Mahlerren musikan espezializatutako bi kantari bakarlari izango dituzte lagun programa honetan: Sarah Fox sopranoa eta Justina Gringyte mezzosopranoa.
Sarrerak salgai daude saio guztietarako euskadikoorkestra.eus-en, baita auditorioen webgune eta leihatiletan ere, 10 eurotik 35 eurora.
Concerts & Billetterie mai
