Beethovenen ‘Bosgarren Sinfonia’ ezaguna izango da Euskadiko Orkestraren hurrengo kontzertu-programaren protagonista
Dinis Sousaren batutapean, Euskadiko Orkestrak Beethovenen ‘5. Sinfonia’ joko du, konposizio entzutetsu eta interpretatuenetako bat, eta Alena Baeva izango du solista gonbidatu gisa Xostakovitxen ‘Biolinerako 2. Kontzertu’ konplexua interpretatzeko.
Sarrerak salgai daude otsailaren 3tik 9ra ohiko lau hiriburuetan izango diren kontzertu guztietarako.
Euskadiko Orkestrak ostiral honetatik aurrera 22-23 Denboraldiko bosgarren programari ekingo dio, ‘Gure patua’ izenekoa. Dinis Sousa portugaldarra lehendabizikoz igoko da Euskadiko Orkestraren podiumera datozen egunotan ohiko lau hiriburuetan izango diren bost kontzertuetan: ostiralean eta astelehenean, otsailak 3 eta 6, Donostiako Kursaal Auditoriumean; asteartean, otsailak 7, Iruñeko Baluarte Auditoriumean; asteazkenean, otsailak 8, Bilboko Euskalduna Jauregian; eta ostegunean, otsailak 9, Gasteizko Principal Antzokian. Kontzertu guztiak 19:30ean izango dira.
“Ta-ta-ta-taaaa (Sol sol sol mi…)”, ez dago zati sinfoniko ezagunagorik munduan Beethovenen Bosgarrenaren hasiera baino. Sinfonia honi “patuarena” izena eman zion egileak, izan ere, haren hitzetan, “horrela jotzen du patuak atea”. Klasikoetan klasikoen den sinfonia hau, duen ospe handiaz harago, Beethovenen bikaintasun formal eta konposizio-birtuosismo handieneko sorkuntzetako bat dela esaten da. Lau nota horiekin eraikin sinfoniko berdingabe bat eraiki zuen Beethovenek. Lehen mugimendu liluragarriaren ostean, beste hiru mugimendu datoz, zeintzuetan Beethovenek bariazio melodikorako bere talentu guztia erakusten duen, baita bere erritmo-zentzu erakargarria eta bere irudimen inkonformista ere; izan ere, azken allegroa garai horretan modan zegoen goreneko une militarraren modarekin bat dator. Baliabide erretoriko horri darion energiak ibilbide garrantzitsua izango du Beethovenen geroagoko obran eta, bereziki, bere 9. Sinfoniaren amaieran.
Beethovenen sinfonia ezagunaren aurretik, Alena Baeva biolinjole errusiarra igoko da oholtzara, eta Xostakovitxen Biolinerako 2. Kontzertu zaila interpretatzeko erronka izango du. Partitura hau bere lagun David Oistrakhentzako konposatu zuen, eta aura ilun bat du, Brezhnev Sobietar Batasuneko presidente izan zen urteetan —Xostakovitxen bizitzaren azken hamarkadan— konposatu zituen obrek bereizgarri dutena. Hemen bakarlariak du ekimena eta hark gidatzen du orkestra eta ez alderantziz, normalean izaten den bezala. Baeva aditua da Xostakovitxen kontzertuetan eta, gainera, Biolinerako 2. Kontzertua grabatu duten gutxietako bat da (Valery Gergievekin eta Mariinski Antzokiko Orkestrarekin grabatu zuen). Biolinista errusiarra Euskadiko Orkestrarekin estreinatu zen Istanbulen, 2020ko martxoan, konfinamendua baino lehen, baina orkestraren Kontzertu Denboraldian parte hartzen duen lehen aldia izango da.
Kontzertu-programa berria osatuko du Wagnerren Parsifal operak, zeinaren hasierak erlijioaz eta patuaz hitz egiten duen, eta kontzeptu horrek izenburua ematen dio programa osoari.
Sarrerak salgai 10 eurotik aurrera
Sarrerak salgai daude saio guztietarako euskadikoorkestra.eus-en, baita auditoriumen webgune eta leihatiletan ere, 10 eta 38 euro bitartean.
Concerts & Billetterie Février
