Juanjo Mena, Alfonso Gomez eta Clara Mouriz izango dira Euskadiko Orkestraren hurrengo kontzertu-programaren protagonistak

Euskadiko Orkestrak datorren astelehenetik aurrera 23/24 Kontzertu Denboraldiko hirugarren programari aurre egingo dio, ‘Ravel / Falla’ izenekoa. Juanjo Mena gasteiztarrak zuzenduko dituen kontzertuak datozen egunetan izango dira ohiko lau hiriburuetan: astelehenean eta asteartean, azaroak 27 eta 28, Donostiako Kursaal Auditoriumean; asteazkenean, azaroak 29, Bilboko Euskalduna Jauregian; ostegunean, azaroak 30, Gasteizko Principal Antzokian; eta ostiralean, abenduak 1, Iruñeko Baluarte Auditoriumean. Kontzertu guztiak 19:30ean izango dira.

EROSI SARRERAK HEMEN

Euskadiko Orkestraren 2023/2024 Denboraldian entzungo dugun kontzertu-programarik euskaldunena izango da honako hau. Hainbat arrazoi daude horretarako. Batetik, lanen aukeraketa; izan ere, bi partituratan garrantzi handia du euskal folkloreak (Gabriel Pierneren Ramuntchoren obertura eta Ravelen Kontzertua Solen). Eta, bestetik, gaur orkestrarekin batera arituko diren interprete guztiak euskal musikariak direlako.

Horietako lehena Juanjo Mena gasteiztarra da, gure orkestra-zuzendarien artean nazioarteko ibilbiderik oparoena izan duena, duela hainbat urtetatik. Izan ere, hainbat orkestratako titularra izan da, hala nola Bergengo Orkestrakoa edo BBC Orkestra Filarmonikokoa, eta ospe handia lortu du Estatu Batuetan; bertan, herrialdeko orkestra garrantzitsuenetako asko zuzendu ditu, esaterako, New Yorkekoa, Bostongoa, Baltimorekoa edo Chicagokoa.

(ikus Juanjo Menaren adierazpen osoa oharraren amaieran)

Gasteizko beste artista bat ere izango dugu gure artean. Euskal musikari honek ere ospe handia du, baina kasu honetan pianojolea da: Alfonso Gomez, Friburgoko eta Stuttgarteko Musika Unibertsitateetako irakaslea, eta musika garaikideko espezialista ospetsua. Gure solista izango da gaur, euskal publikoak gehien maite duen pianorako kontzertuetako batean: Maurice Ravelen Kontzertua Solen, 1929 eta 1931 artean idatzia.

Gomezen hitzetan: “Obra argitsua eta alaia da, baina asko sufritu duten pertsonek duten alaitasun mota hori erakusten du (Ravelek oso gertutik bizi izan zituen Lehen Mundu Gerrako hondamendiak). Kontziente naiz espektatibak oso altuak direla kontzertu honen interpretazio-historia apartagatik, baina saiatuko naiz ahalik eta arreta gehien jartzen musikan, konpositorean, testuan. Ilusioz eta ikusleekiko errespetu handiz egiten diot aurre obrari, alderdi guztietan nire barrenetik ahalik eta gehien emateko asmoz. Pribilegiatua sentitzen naiz errepertorio hau Euskadiko Orkestrarekin jo dezakedalako, bere DNAn idatzita baitarama orkestra honek soinu raveliarra. Ziur nago kontzertu zirraragarriak izango direla”.

Azkenik, eta gure lurreko artisten triunbiratu hau osatzeko, Clara Mouriz mezzosoprano donostiarrak parte hartuko du kontzertuaren bigarren zatian. 2016an egin zuen debuta Euskadiko Orkestrarekin, Cantelouberen euskal abestien bilduma eder bat abestuz. Oraingoan, berriz, nazioarteko ibilbide garrantzitsua egin ondoren itzuliko da, eta Fallak iberiar penintsulako musiketan inspiratuta sortu zituen melodiak abestuko ditu. Fallak XVIII. mende amaierako Andaluziako errotari batzuen gorabeherak kontatzen ditu, eta beraz, espainiar giro nabarmena islatzen du, kostumbrismo handikoa. Iberiar penintsulako hainbat dantzaren erritmoak eta armoniak bildu zituen Fallak, jotatik eta farrucatik hasi, eta fandangora edo seguidilletara. Fallak idatzitako ballet osoa entzun ahal izango da kontzertu hauetan. Juanjo Menak eta Clara Mourizek sona handiko eszenatokietan defendatu dute dagoeneko obra hau, tartean, Londreseko Proms ospetsuetan BBC Philharmonic-ekin eta Pragan Urte Berriko Kontzertuan Txekiar Filarmonikoarekin.

Folklorea nagusi den programa honi ekiteko orkestrak Ramuntchoren obertura laburra interpretatuko du, Gabriel Piernek 1908an idatzi zuena Pierre Lotiren izen bereko eleberriaren antzerki-bertsio baten osagarri gisa.

Sarrerak salgai daude saio guztietarako euskadikoorkestra.eus-en, baita auditoriumen webgune eta leihatiletan ere, 10 eta 38 euro bitartean.

Juanjo Menaren hitzak
 

Plazera da beti bezala Euskadiko Orkestrarekin musika egitea etxetik gertu, familiatik gertu maite dudan lagunengandik gertu. Programa hau oso ederra da eta maitasun handiz prestatu dut, indar, energia, kriterio eta ezagutzaz. Hasteko, ‘Ramuntcho’ obra, Gabriel Piernerena, konpositore frantsesa, Paris unibertsoa zen garai batean jainko moduko bat zena. Euskal doinuen gainean idatzitako eta energiaz betetako musika da. Ravelen pianorako kontzertu bat ere izango dugu, ‘Kontzertua Solen’, pianorako kontzertu garrantzitsuenetakoa ere badena, ederrenetakoa, eta jendeak sarri negar egiten du kontzertua hasi bezain pronto. Obra erraldoia da, bene-benetan maite dudan konpositore batena, eta uste dut Euskadiko Orkestrak ere baietz, bere egin baitu aspaldidanik. Alfonso Gomezek pianoan eskainiko digu behin ere entzungo dudan kontzertu honen interpretaziorik onenetakoa. Eta amaitzeko, berriz Clara Mourizekin aritzea plazera da, batera disko ugari egin baititugu, grabazio asko. Urte amaierako kontzertuetan eta festa-giroko hitzorduetan ere elkarrekin aritu gara, jakinduria handiarekin kantatzen duen interpretea baita bera, dotoretasun nabarmenarekin, eta samurtasun handiarekin. Eta kasu honetan, zoragarria da bera ondoan izatea kontzertu honetako maisu-lana gauzatu ahal izateko, Fallaren 'Hiru puntako kapela' maitea, hain zuzen. Baina ez da edozein bertsio izango: ez dira suiteak, Fallaren ballet osoa baizik, oso konplexua dena. Horregatik da ohikoa laburtzea eta suiteak interpretatzea, obra osoa jotzea zaila delako, baina uste dut orkestra momentu bikain batean dagoela eta buru-belarri lanean ari da. Lehen entsegu bat izan dugu eta zoragarria izan da, eta hala izaten jarraituko du. Beraz, espero dut publikoak ere kontzertu hauez gozatu ahal izango duela.

Informations additionnelles