Alberto Iglesiasek Iciar Bollainen ‘Maixabel’ filmaren soinu-banda grabatu du Euskadiko Orkestrarekin

Alberto Iglesias konpositore donostiarra Maixabel filmaren —Iciar Bollain zinemagileak zuzendutako hamaikagarren film luzearen— soinu-bandaren musika grabatzen ari da aste honetan Donostian Euskadiko Orkestrarekin batera.

Atzo, ekainak 21, Euskadiko Orkestraren egoitzan egindako grabazioa musikagilearen eta orkestraren arteko lehen lankidetza izan da. Musikariak hamaika Goya sari irabazi ditu eta hiru aldiz izendatu dute Oscar sarietarako. Maixabelen soinu-banda Iciar Bollain zuzendariarekin lankidetza estuan idatzi duela aitortu du: "Partiturak lotura estua bilatzen du narrazio honekin. Musika hau, xalotasuna helburu, bi sonoritatetan banatzen da. Bata minaren sinboloa da. Bestea argiarena".

Euskadiko Orkestrari dagokionez, zine eta telebistako soinu-banden grabazioaren arloan hainbat filmetan kolaboratu du Fernando Velazquezekin: Juan Jesus Garcia Galocharen Moomios (2021); Raul Ramonen Poderoso Victoria (2020); Imanol Rayoren Hil Kanpaiak (2020); Wim Wendersen Inmersión (2017); J.A. Bayonaren A Monster Calls (2016) eta The Impossible (2012); Oriol Pauloren Contratiempo (2016); Emilio Martínez-Lázaroren Ocho Apellidos Vascos (2014); François Truffauten The Bride Wore Black (1968). Gainera, The Innocent (2021), Patria (2020) eta Soinujolearen semea telesailen musika ere grabatu du.

Maixabel

Blanca Portillo eta Luis Tosar ditu protagonista filmak, Maria Cerezuela eta Urko Olazabalekin batera. Isa Campo gidoigileak (Entre dos aguas, 2018) eta Iciar Bollainek idatzi dute, eta pelikula benetako gertaeretan oinarritzen da. Maixabel Lasaren istorioa kontatzen du, ETAk hildako Juan Maria Jauregui euskal politikariaren alargunarena, hain zuzen ere, bere senarraren hiltzaileekin espetxean elkarrizketatzeko prest agertu zen lehen biktimetako batena.

Maixabel Kowalski Films (Koldo Zuazua) eta FeelGood (Juan Moreno eta Guillermo Sempere) ekoiztetxeek ekoitzi dute. RTVEk, EiTBk eta Movistar+ek hartu dute parte, Kultura Ministerioaren ICAAren, Eusko Jaurlaritzaren eta Gipuzkoako Foru Aldundiaren babesa izan du eta Donostia–Gipuzkoa Film Comission erakundearen kolaborazioa ere bai. Filma Buena Vista Internationalek banatuko du Espainian eta nazioarteko salmentak Film Factoryk egingo ditu.